I gjendet drogë dhe fara kanabisi, arrestohet 26-vjeçari nga Lazarati

Policia e Gjirokastrës ka goditur një rast të veprimtarisë kriminale në fushën e narkotikëve. Gjatë një aksioni të fundit, uniformat blu kanë sekuestruar lëndë narkotike dhe fara të dyshuara të bimës narkotike cannabis sativa, si dhe kanë vënë në pranga nje 26-vjeçar banues në Lazarat.

Njoftimi i policisë:/ Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, specialistët e Sektorit për Hetimin e Krimeve në Drejtorinë Vendore të Policisë Gjirokastër arrestuan në flagrancë shtetasin:

F. Gj., 26 vjeç, banues në Lazarat, Gjirokastër.

Specialistët e Sektorit për Hetimin e Krimeve, në bazë të informacioneve të marra në rrugë operative se shtetasi F. Gj. dispononte lëndë narkotike, organizuan punën dhe gjatë kontrollit të ushtruar në banesën e tij gjetën dhe sekuestruan rreth 500 gr lëndë të dyshuar narkotike cannabis sativa dhe një sasi fara të dyshuara të bimës cannabis sativa.

Materialet i kaluan Prokurorisë pranë Gjykatës së Shkallës së Parë Gjirokastër, për hetime të mëtejshme, për veprën penale “Prodhimi dhe shitja e narkotikëve”.///