Kërkoi masë më të lehtë sigurie, GJKKO lë në burg Fredi Belerin

 Gjykata e Posaçme Kundër Krimit të Organizuar dhe Korrupsionit ka rrëzuar sot kërkesën e Fredi Belerit, Kryetar i zgjedhur i Bashkisë së Himarës, i cili kishte kërkuar masë më të lehtë sigurie nga ajo e vendosur deri më tani e “Arrestit me burg”.

Trupa gjykuese Gjykatës së Posaçme e përbërë nga Erjon Çela, Irena Gjoka dhe Flora Hajredinaj, rrëzuan këtë kërkesë të Belerit, i cili për shkak se ndodhet në qeli, që prej datë 12 maj 2023, nuk është betuar ende si kryetar i Bashkisë së Himarës e për pasojë nuk ka marrë ende detyrën. Beleri ka afat 5 ditë kohë për të ankimuar vendimin e GJKKO në Apel.

Por ndërkohë, më herët GJKKO pranoi ankimimin e Fredi Belerit kundër vendimit të SPAK, i cili vendosi mos-fillimin e procedimit penal të bërë nga kryetari i zgjedhur i Himarës, kundrejt dëshmitarit Arsen Rama. Ky i fundit akuzohet nga Beleri se ka kryer deklaratë të rreme përpara oficerit të Policisë Gjyqësore, por SPAK vendosi të mos nisi hetim, kësisoj Beleri e ankimoi vendimin e SPAK në GJKKO, ku togat e zeza i dhanë të drejtë Belerit.

“Prokuroria e Posaçme kundër Korrupsionit dhe Krimit të Organizuar, mbi bazën e kallëzimit penal të shtetasit Dhionisios Alfred Beleri, të bërë ndaj shtetasit A.R për kryerjen e veprës penale “Deklaratat e rreme përpara oficerit të policisë gjyqësore”. Pas vlerësimit të kallëzimit penal të sipërcituar, Prokuroria e Posaçme Kundër Korrupsionit dhe Krimit të Organizuar, më datë 11.10.2023 vendosi: “Mos-fillimin e procedimit penal, për kallëzimin penal Nr. 211 datë 09.10.2023 të depozituar nga shtetasi Dhionisios Alfred Beleri. Ky vendim i njoftohet kallëzuesit, i cili ka të drejtën e ankimit në Gjykatën e Posaçme të Shkallës së Parë për Korrupsionin dhe Krimin e Organizuar brenda 10 (dhjetë) ditëve nga marrja dijeni.”, njofton SPAK.

“Vendimi i mësipërm është ankimuar në Gjykatë nga kallëzuesi më datë 23.10.2023. Lidhur më shqyrtimin e kësaj kërkese, Gjykata vendosi ta shqyrtoi në dhomë këshillimi pa praninë e palëve dhe të sekretares gjyqësore. Gjykata pasi vlerësoi kërkesën vendosi: Pranimin e ankimit të paraqitur nga shtetasi Dhionisios Alfred Beleri. Shfuqizimin e vendimit të Prokurorisë së Posaçme kundër Korrupsionit dhe Krimit të Organizuar Tiranë “Për mosfillimin e procedimit penal që i përket kallëzimit Nr. 211 datë 09.10.2023”, datë 11.10.2023. Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 10 (dhjetë) ditëve, duke filluar ky afat nga e nesërmja e njoftimit të këtij vendimi.’- njofton GJKKO.

Fredi Beleri u arrestua në ambientet e një lokali në Himarë, vetëm 2 ditë para zgjedhjeve lokale të 14 majit 2023. Ai u arrestua bashkë më bashkëpunëtorin e tij Pandeli Kokaveshi, nën akuzën se po blinte vota.///