Krifca: Sot është dita për ta bërë zërin e qytetarëve të dëgjohet

Nga Etleva XHAJANKA

Ministrja e Bujqësisë dhe Zhvillimit Rural Frida Krifca ka votuar që në orët e para të mëngjesit të sotëm në shkollën “Andon Zako Çajupi” në Tiranë, për zgjedhjet vendore të 14 majit.

Ministrja Krifca i bëri thirrje qytetarëve, që të votojnë masivisht në zgjedhjet vendore, që zhvillohen sot në të gjithë vendin.

“Thirrja ime është që të gjithë të dalin e ta ushtrojnë të drejtën e tyre për të votuar pasi sot është dita e duhur për ta bërë zërin e qytetarëve të dëgjohet”, tha Krifca përmes një videomesazhi në rrjetet sociale.

Ministrja ftoi qytetarët të votojnë, teksa theksoi se vota është fuqia e gjithsecilit që të zgjedhë ata që duam të çojnë punët përpara.

“Le të mblidhemi të gjithë si një komunitet e të zgjedhim ata që duam të çojnë punët e 61 bashkive tona përpara. Është dita e duhur për të treguar se demokracia është më e fortë kur të gjithë marrin pjesë për të ndërtuar të ardhme më të fortë”, deklaroi ministrja Krifca.///