Meta: Të themelojmë një media transparente /Veliaj: Ka jo vetëm lekët por dhe historinë e tij të 7%

 Presidenti i Republikës, Ilir Meta shprehu sot solidaritetin e tij, me të gjithë gazetarët që janë në një presion brutal nga të gjitha drejtimet për shkak të tmerrit nga raportimi i të vërtetave të tyre në publik.

“Tmerri nga fjala e lirë dhe pasqyrimi i së vërtetës është tipari kryesor i regjimeve kriminale që nuk e bazojnë qeverisjen mbi votën e lirë dhe fjalën e lirë, por në mbajtjen të shtypur dhe të frikësuar të popullit të tyre”, tha Meta.

“Asgjë nuk e ndal Ndryshimin! Madje koha e Ndryshimit ka kaluar prej 4 vitesh. Tani ka ardhur Kohë tjetër!”, theksoi Meta.

“Ju lutem gazetarëve të më njoftojnë që kur të gjithë pronarët e tyre të dorëzohen para presioneve të pushtetit, të themelojmë së bashku një media transparente që ta nisë Kohën e Re me Përmbysjen e këtij regjimi të neveritshëm mediatik që turpëron çdo njeri me minimum dinjiteti”, u shpreh Meta.

“Mos u dorëzoni para presioneve të pushtetit dhe pronarëve!”, apeloi Meta.

“Kujtoni poezinë e Havzi Nelës dhe do i qëndroni misionit tuaj fisnik në shërbim të të vërtetave dhe popullit shqiptar që meriton të rimarrë në dorë fatet e Tij”, nënvizoi Meta.

“Çdo shqiptar që do një media në shërbim të së vërtetës do jetë aksioner! Dhe Bordi Drejtues do jetë i përbërë vetëm nga gazetarë kurajozë të cilët janë shantazhuar, kërcënuar dhe lënë pa punë nga regjimi”, tha Meta.

Ndaj këtyre deklaratave të Presidentit Meta reagoi kryetari i Bashkisë së Tiranës, Erion Veliaj, i cili u shpreh se, “lajm i mirë që Ilir Meta ka marrë iniciativën për një media të re transparente dhe kritike me pushtetin”.

“Ai ka jo vetëm lekët, por dhe historinë e tij të 7%, që mund ta mbajë gjallë këtë medie si me para ashtu dhe me përmbajtje gjithë jetën! Suksese”, tha Veliaj.///