Operacioni “Bregdeti ynë”, rinis në Dhërmi me shembjen e një 5 katëshi

Rinisi sot operacioni “Bregdeti ynë”, i ndërprerë gjatë sezonit turistik. Operacioni nisi me shembjen e një objekti 5-katësh në Dhërmi.

Kryeministri Edi Rama, i cili publikoi videon e shembjes së objektit, bëri të ditur se qeveria do të hartojë një ligj për vijën bregdetare së bashku me planin e ri të administrimit të plazheve e të pastërtisë së zonave turistike.

Zëvendësministri i Brendshëm, Julian Hodaj, i cili ishte i pranishëm gjatë procesit të shembjes së objektit, tha se bregdeti do të pastrohet nga çdo ngrehinë abuzive.

“Rinis aty ku u ndërpre në qershor për shkak të sezonit turistik, operacioni i pastrimit të bregdetit nga çdo ngrehinë abuzive apo abuzim me lejet e ndërtimit, për të cilat jo vetëm toleranca do të jetë zero, me shembjen e ndërtimeve pa leje, por do të vihen para përgjegjësisë shkelësit e ligjit, në bazë të normave të reja penale për shkeljet në ndërtim”, u shpreh ai.

Hodaj vuri në dukje se bregdeti është pasuri e të gjithë shqiptarëve dhe do të shfrytëzohet si i tillë./ata///