PD-Zhupa: Asnjë banor i lagjes së re në Laç nuk ka marrë çelësat

Zëdhënësja e Partisë Demokratike, Ina Zhupa deklaroi sot se asnjë banor nuk ka marrë çelësat 3 javë pas inaugurimit të pallateve me Erdogan në Laç. Zhupa shprehet se “gati 3 javë më parë, Edi Rama përdori presidentin e Turqisë për të mashtruar me apartamentet e ndërtuar nga turqit në Laç. Rama dhe Erdogan u dhanë çelësat 4 familjeve, por, në të vërtetë, ato ishin vetëm sa për propagandë. Në kompleksin e pallateve të reja, nuk ka hyrë asnjë familje”.

“Gjithçka ishte një show, i vënë në skenë nga Edi Rama. Banorëve nuk u jep askush përgjigje pse nuk po futen akoma në shtëpitë e tyre. Sa më gjatë rrinë ata në shtëpi me qira, aq më i madh është dëmi që i shkaktohet buxhetit, duke paguar bonusin e qirave, ndërsa shtëpitë e reja kanë përfunduar së ndërtuari rreth 3 muaj më parë”, tha ajo.

Po ashtu, Zhupa shton se “qeveria dhe bashkia heshtin, duke sjellë vërdallë mbi 500 familje të Laçit, që po pengohen të hyjnë në shtëpitë e tyre, të inauguruara 2 herë deri tani. Një herë nga Rama para Vitit të Ri, një herë nga Rama dhe Erdogan, 3 javë më parë”///