SARANDANEWS.AL

Lajme nga Saranda News Albania. Saranda Radio transmetim live nga Saranda dhe Ksamil. Lajmi fundit ne Saranda News.Al, Foto dhe Video Livestream

Prezantohet eTransport, mundësi e re informacioni për Shqipërinë turistike

Në Tiranë është prezantuar sot platforma “eTransport”, e cila do të ofrojë informacion të detajuar për transportin publik ndërqytetës, për të gjithë turistët vendas e të huaj që duan të udhëtojnë nëpër Shqipëri.

Ministria e Turizmit dhe Mjedisit, Mirela Kumbaro e pranishme në prezantimin e platformës “eTransport” u shpreh se kjo alternativë zgjidh problemin e turistëve të huaj për të udhëtuar brenda Shqipërisë duke u ofruar informacionin e duhur për vendndodhjen e terminaleve, aksesimin e biletave online dhe itineraret e transportit.

“Ky nuk është një shërbim vetëm për 2.8 milionë banorë, por për shumë më shumë,
sepse deri më 30 shtator të këtij viti ne shënuam 6.5 milionë vizitorë të huaj, shifër e barabartë me atë të vitit 2019″, tha ajo.

“Jo vetëm kaq, por Tirana sivjet ka pasur një fluks turistësh të rinj, të grumposhave 20−35 vjeç. Të gjitha këto tregojnë për një publik të shtuar, mobilitet, dëshirë për lëvizje. Ky shërbim, jo vetëm na jep më shumë informacion, por na shërben për të kuptuar se nuk ka nevojë të kesh makinën tënde për të lëvizur, por falë transportit ndërqytetas që po e rrit cilësinë e shërbimit, reduktojmë ndotjen urbane dhe ndërurbane”, u shpreh ministrja.

Në marrëveshjen e nënshkruar mes Ministrisë së Turizmit dhe Mjedisit, si dhe Drejtorisë së Përgjithshme të Shërbimeve të Transportit Rrugor, qëllimi është promovimi i platformës “eTransport” lançimi i së cilës do të shënojë fillimin e një epoke të re të digjitalizimit të transportit ndërqytetas.

Gjatë panelit të organizuar nga DPSHTRR, pjesëmarrës ishin drejtori Blendi Gonxhe, kryetari i bashkisë Erion Veliaj, Ministrja e Shtetit për Mbrojtjen e Sipërmarrjes Edona Bilali.

Me përfundimin e fazës së parë të projektit të platformës, përmes aksesit në telefonat e tyre, udhëtarët do të mund të njihen me destinacione eksperienca, site dhe zonat e mbrojtura, evente me interes për të pasuruar jetën kulturore, artistike të turistëve në nivel qendror dhe lokal. Gjithashtu do të njihen edhe me infrastruktura mikpritëse në qytete të ndryshme që përmban platforma.

“Jo të gjithë turistët vijnë me makina apo marrin makina me qera dhe kanë dëshirë të lëvizin e të zbulojnë Shqipërinë në të përditshmen e saj. Ne në Shqipëri, sipas disa shifrave, kalojmë 5 orë në ditë me telefon në dorë, duke hapur dhe mbyllur të gjitha kanalet e komunikimit. Çdo kanal komunikimi është gjithashtu një kanal promovimi nëse duam ta përdorim kështu. Së bashku me drejtorin e DPSHTRR Blendi Gonxhe, gjetëm konsensusin që ta përdorim së bashku këtë platformë si një mënyrë promovimi të Shqipërisë turistike, të qyteteve, peizazheve tona sepse është një mënyrë shumë e mirë t’i shoqërojmë udhëtarët me informacion turistik duke krijuar një mundësi të re informacioni të Shqipërisë turistike brenda kësaj platforme”, u shpreh Kumbaro.///

error:
%d bloggers like this: