Rama takon Leonardo Di Caprion: Kur je komshi dhe të lidh mbrojtja e Vjosës

 Kryeministri Edi Rama ka publikuar një foto në rrjetet sociale duke biseduar me aktorin e njohur të Hollivudit, Leonardo Di Caprio.

Kryeministri Rama po merr pjesë në Konferencën e Klimës në Glasgou, Skoci.

“Kur je komshi me Leonardo Di Caprion dhe të lidh mbrojtja e Vjosës”, shkruan Rama.

Një vit më parë aktori i njohur amerikan Leonardo Di Caprio vlerësoi vendimin e kryeministrit të Shqipërisë Edi Rama dhe qeverisë për ndalimin e ndërtimit të hidrocentraleve në lumin Vjosë dhe kthimin e saj në një park kombëtar.

Leonardo Di Caprio iu bashkua dy vjet më parë nismës për mbrojtjen e lumit Vjosa kundër ndërtimit të hidrocentraleve.

Në rrugën e tij, mbi 270 km, lumi i Vjosës karakterizohet nga kanione të bukur, rrjedha të rrëmbyeshme, ishuj dhe kthesa që krijojnë gjarpërime të mrekullueshme.Çfarë e bën këtë lumë vërtetë të veçantë ndërkombëtarisht është fakti, se pothuajse të gjitha degët e tij rrjedhin të pandërprera dhe të paprekura, duke krijuar një rrjet lumor të gjallë si diçka që nuk haset më aktualisht në Europë.///