SHËNIM DITE-Fluksi turistik-Greqi-Shqipëri –Greqi .”Ena komunikuese” që duhet zhbllokuar.

Sapo u dha lajmi se me ftesë të ministrit grek të Turizmit, Harry Theoharis, ministri i Turizmit dhe Mjedisit, Blendi Klosi ndodhet për vizitë zyrtare në Athinë,, te persona të biznesit turistik në Sarandë e më gjërë në Shqipëri, mund të degjoje shprehjen e sintetizuar në semantikën e një fjalë e vetme: “Më në fund!”

**

Pra, zhvillimet për zhbllokimin e qarkullimit të turistëve  priten “jo nga qielli” por nga kontaket intensive mes fqinjëve. Më së pari në nivele qeveritare po edhe të strukturavë respektive turistike , të bëhen përçapje për “ç’bllokimin e “enëve komunikuese” mes të dy brigjeve.

Të shpresojmë që edhe takimi I ambasadorës sonë zonjes Hajdaraga në Athinë me kreun e Ministrisë së Jashtmë të Greqisë zotin Dendias, të çojë ujë në kahjen e mësipërme, që në analizë të fundit “përkthehet”në  levredi reciproke. .

“Vaksinimi, ishte dhe është një domosdoshmëri për përmirësimin e situatës në vend. Qeveria e bëri detyrën e vet, e natyrshëm po bëhet gjithnjë e më shumë. Ishte një kusht i domosdoshëm”, ka deklaruar një ditë më parë Besnik Vathi, nga operatorët e njohur të sektorit turistik në vendin tonë. Për rritjen e numrit të turistëve në vendin tonë, ai e konsideron të rëndësishëm hapjen e kufijve edhe nga vendet e tjera.

Vathi, i cituar nga ATSH,-sjell shembullin e Greqisë që mban të mbyllur kufirin me Shqipërinë, në kushtet kur Shqipëria sot paraqitet shumë më mirë se vendet e rajonit madje edhe më mirë se Greqia për vaksinim e shkallës së infeksionit.

“Greqia i ka hapur kufirin Maqedonisë së Veriut dhe Bullgarisë dhe vazhdon të mbajë mbyllur kufirin me Shqipërinë. Në këto kushte detyra e qeverisë shqiptare dhe e Shqipërisë nuk është vetëm të vaksinohet, por të sigurojë hapje të kufijve me vendet e tjera, si në marrëdhëniet dypalëshe edhe në marrëdhëniet shumëpalëshe”, shton ai.

**

Mësohet se në  takimin bilateral të Athinës mes dy ministrave, u fol për rritjen dhe shkëmbimin e bashkëpunimit mes dy vendeve në fushën e turizmit, si një nga çështjet që i bashkon fort dy vendet tona kufitare e aq më shumë në kohën kur ky sektor ka pësuar dëme të mëdha nga pandemia.

Ministri Klosi dhe homologu i tij grek kanë ndarë  pikëpamjet respektive për sektorin e turizmit, rrugët për rritjen e tij, sikundër edhe për rritjen e bashkëpunimit të dy vendeve në shkëmbimin e eksperiencave. Veçanërisht kjo do ta ndihmonte sektorin turistik shqiptar në rritjen e turizmit detar dhe menaxhimin e vijës bregdetare.

Ministri Blendi Klosi në Athinë si përfaqësues i qeverisë shqiptare,  është ndalur më të drejtë gjithashut tek lëvizja e lirë e qytetarëve në kufi, në kushtet e rënies së infektimeve dhe rritjes së vaksinimit.

Sipas burimeve të zyrtare, Klosi citohet të ketë thënë :”Besimplotë se ministri Theoharis, do të jetë avokati i situatës së mirë pandemike, e reduktimit të infektimeve, vaksinimit masiv për t’ia përcjellë instastancave vendimmarrëse të masave”.

**

Në portin detar të Sarandës , tragetet e  linjës detare ndërkombëtare  Sarandë-Korfuz-Sarandë, po “ndryshken” prej gati dy vitesh në kalata, në pritje të dritës jeshile.

Njoftimi se këtë të hënë (7 qershor) do të ngrihet trau i Qafë Botës nga pala helene, sigurisht, është optimist në klimën e stresit të madh social që prodhoi pandemia globale.

Sipas të dhënave nga INSTAT, katër mujori i parë i këtij viti solli në territorin e vendit 754.796 qytetarë të huaj, nga të cilët mbi 380 mijë qytetarë nga Kosova dhe 120 mijë nga Maqedonia e Veriut.
Turizmi është ndër sektorët më të rëndësishëm të ekonomisë në vend pasi kontribuon me rreth 10% në Prodhimin e Përgjithshëm Kombëtar.///SARANDANEWS.AL///