SHQIPERI  – Mijëra protestojnë në Tiranë për drejtësi ndaj luftëtarëve të UÇK-së

 Veteranë të luftës së Kosovës dhe mijëra mbështetës të tyre u mblodhën sot  në kryeqytetin shqiptar, Tiranë, në një protestë kundër një gjykate të mbështetur nga Bashkimi Evropian, e cila po ndjek penalisht ish-luftëtarët që morën pjesë në luftën e viteve 1998–1999 për pavarësinë nga Serbia, duke pretenduar se gjykata është e njëanshme dhe e padrejtë, sipas AP.

Protesta u organizua nga shoqata e veteranëve të njohur si  “OVL-UÇK”, me mbështetjen e qeverisë dhe kryeministrit të Shqipërisë, nën moton: “Liria ka një emër. Drejtësi për çlirimtarët”.

Ish-presidenti i Kosovës Hashim Thaçi, ish-kryetarët e Kuvendit , Kadri Veseli dhe Jakup Krasniqi si dhe ish-deputeti Rexhep Selimi ndodhen në paraburgim që nga viti 2020 dhe po gjykohen në Dhomat e Specializuara të Kosovës, një gjykatë e mbështetur nga BE-ja me seli në Hagë, Holandë.

Ata akuzohen për “vrasje, tortura dhe persekutim të civilëve” gjatë dhe pas luftës.

Një poster i madh me fotot e tyre dhe me mbishkrimin “Heronjtë e luftës dhe të paqes”*ishte varur pas podiumit të protestës.

“Shqiptarët nuk i besojnë Dhomave të Specializuara. Proceset në Hagë janë të njëanshme dhe të padrejta,” deklaroi Hysni Gucati, kreu i “OVL-UÇK”-së.

Edhe ish-presidenti shqiptar Alfred Moisiu, 95 vjeç, mori pjesë në protestë, duke kërkuar drejtësi dhe duke thënë se të akuzuarit “janë mbajtur në burg pa prova, mbi akuza të fabrikuara”.

Protesta u zhvillua në mënyrë paqësore.

Gjykata dhe zyra përkatëse e prokurorisë u krijuan pas një raporti të Këshillit të Evropës në vitin 2011, ku përfshiheshin akuza se luftëtarë të UÇK-së kishin tregtuar organe njerëzore të marra nga të burgosurit dhe kishin vrarë serbë dhe shqiptarë etnikë.

Megjithatë, akuzat për trafikim organesh nuk janë përfshirë  në aktakuzat e gjykatës.

Dy ish-anëtarë të tjerë të UÇK-së janë dënuar tashmë nga kjo gjykatë.

Vetë Gucati dhe një tjetër zyrtar i UÇK-së janë shpallur fajtorë për “ndikim te dëshmitarët dhe pengim të drejtësisë”.

Rreth 11.400 persona, kryesisht shqiptarë etnikë, humbën jetën gjatë luftës, përpara se një fushatë bombardimesh e NATO-s të detyronte Serbinë të tërhiqte trupat e saj nga Kosova dhe t’ia dorëzonte administrimin Kombeve të Bashkuara dhe NATO-s.

Kosova shpalli pavarësinë nga Serbia në vitin 2008, e njohur nga Shtetet e Bashkuara të Amerikës dhe shumica e vendeve perëndimore, por jo nga Serbia dhe aleatët e saj Rusia dhe Kina.

Tensionet ndërmjet Kosovës dhe Serbisë mbeten të larta. (Admir ABULE).///