Të shqetësuar për kërcënimet ndaj zyrtarëve të drejtësisë

Ambasada e SHBA-së në Tiranë ka reaguar sot në lidhje me kërcënimet ndaj përfaqësuesve të drejtësisë në vend, duke theksuar se “një sistem drejtësie që funksionon pa frikë dhe kërcënime është kërkesë legjitime e popullit shqiptar”.

Në një postim në rrjetet sociale, Ambasada shprehet se, “Shtetet e Bashkuara janë thellësisht të shqetësuara për kërcënimet për dhunë ndaj zyrtarëve të zbatimit të ligjit që po punojnë për ta bërë Shqipërinë të sigurt, të begatë dhe më demokratike”.

Sipas saj, hetuesit, prokurorët dhe gjyqtarët duhet të jenë në gjendje të kryejnë detyrat e tyre pa kërcënime apo kanosje.

“Shtetet e Bashkuara ritheksojnë mbështetjen e tyre të palëkundur për zyrtarët e zbatimit të ligjit në Shqipëri, të cilët po luftojnë korrupsionin dhe krimin e organizuar me guxim, si dhe janë gati të mbështesin përpjekjet e tyre”, thuhet në reagim.///