Tjetër makinë bie në Kanalin e Butrintit, shoferi dhe pasagjeri dalin me not. S’ka sinjalistikë në rrugë.

Një tjetër automjet përfundoi një ditë më parë në ujërat e Kanalit të Butrintit, në afërsi të fshatit Vrinë.

Drejtuesi i automjetit të marrë me qira vinte nga kufiri, ka humbur kontrollin dhe ka përfunduar në kanal.

Nga burime paraprake bëhet me dije se kanë qenë dy persona brenda në mjet, të cilët kanë mundur të dalin me not pa dëmtime. Policia e Sarandës është ndodhur menjëherë në vendin e ngjarjes ku ka nisur hetimet.

Sipas policisë mjeti që ka rënë ka qenë tip “Fiat” me drejtues shtetasin e huaj Patryk Sajnog. Ai i është nënshtruar testit të alkoolit ku herën e parë ka rezultuar në masën 0.906 mg/l dhe më pas 0.894 mg/l. Gjithashtu ai rezulton pa leje drejtimi. Për këtë arsye është arrestuar nga policia. Disa orë më pas automjeti është nxjerre me vinç nga uji. Në 31 korrik një tjetër automjet ra në të njëjtin vend duke shkaktuar plagosjen e dy turistëve të huaj të cilët vinin nga Qafë-Bota.

Burime pranë Komisariatit të Policisë Sarandë bëjne me dije se ky vend është rrezik konstant për aksidente dhe jo rrallë automjetet përfundojnë në kanal, pasi nuk ekziston asnjë sinjalistikë dhe barrierë që të paralajmërojë drejtuesit e mjeteve se aty është kthesë e fortë. Nga ana e sektorit të Qarkullimit Rrugor në Komisariatin e Sarandës është dërguar disa herë shkresë drejt ARRSH për vendosjen e sinjalistikës, por ende nuk ka asnjë reagim.///