Zmbrapset furia e flakëve drejt Parkut Kombëtar të Llogorasë

Zmbrapset furia e flakëve drejt Parkut Kombëtar të Llogorasë.

Kryeministri Edi Rama publikoi sot një video nga puna e forcave Komando, të cilët arritën të zmbrapsin flakët që po i drejtoheshin Parkut Kombëtar të Llogorasë.

“Zmbrapset furia e flakëve drejt Parkut Kombëtar të Llogorasë, e tani sapo është bërë rifreskimi i trupave që do të vijojnë gjatë gjithë natës me mbajtjen nën kontroll të situatës”, u shpreh kryeministri Rama.

Majori Pëllumb Hidri ,zv/komandant i Forcave Komando, shpjegoi në video se si u bë e mundur zmbrapsja e zjarrit që po i drejtohej Parkut Kombëtar të Llogorasë.

“Jemi në lartësinë 1350 metra. Siç shihet këtu sapo bashkë kemi ndaluar zjarrin. Shihet edhe vija e ndalimit. Ishte një vatër shumë e rrezikshme. Në krahun e djathtë timin edhe 20 metra dhe do të futej në pyllin e Llogorasë dhe do të ishte e pamundur pastaj për t’u kontrolluar”, u shpreh ai.

“Në krahun tim të majtë është Llogoraja e cila falë Zotit dhe falë ushtarëve është neutralizuar një vatër shumë e madhe në anën e Dukatit. Por na ndihmuan edhe helikopterët me ujë nga sipër. Nëse ne do të bëjmë këtë lloj perimetri siç e kemi nisur deri lart, atëherë ne sigurojmë përfundimisht grykën e Llogorasë bashkë me gjithë Llogorasë nga flakët”, tha major Hidri.

“Duke u ndihmuar nga erërat e forta zjarri ishte i menjëhershëm, kishte shumë tym, por falë këmbënguljes tonë, siç e kanë Komandot që nuk dorëzohen kurrë arritëm ta ndalojmë”, theksoi ai.

Ministria e Mbrojtjes njoftoi sot se aktualisht në vendin tonë janë 13 vatra zjarri, ku janë angazhuar mbi 500 efektivë të Forcave të Armatosura, të cilët vijojnë pa u lodhur punën nga toka dhe nga ajri.///