PD: Qeveria braktis qytetarët për të paguar inceneratorët

 Ish-deputetja e Partisë Demokratike, Dhurata Çupi u shpreh sot në një deklarate për mediet, se Qeveria po braktis qytetarët në kohën e pandemisë, për të paguar inceneratorët.

“Këtë javë numri i të infektuarve nga Covid-19 arriti kulmin. Në shkolla virusi është përhapur si gripi. Qytetarët po paguajnë vetë për mjekimin, bizneset janë në krizë të thellë dhe mijëra familje rrezikojnë të mbeten pa një punë”, u shpreh Çupi.

Sipas saj, qeveria nuk ka vendosur fonde në dispozicion për të siguruar higjienë dhe kushte minimale sigurie në shkolla. “Asgjë që është në interesin e qytetarëve nuk ka ndodhur, edhe pse opozita i ka bërë gati planin e shpejtë të rimëkëmbjes, që i vjen në ndihmë çdo familjeje”, theksoi ajo.

“75 milionë euro janë marrë nga xhepat e qytetarëve më të varfër të Europës dhe janë transferuar në parajsë fiskale, ku fshihen pronarët e kompanive fantazmë të inceneratorëve që nuk ekzistojnë. Vetëm me 1 firmë të vetme, i ka dhënë 2 milionë euro para pak ditësh inceneratorit të Tiranës dhe atij të Fierit. Kemi faktuar këto ditë me pamje se inceneratorët nuk ekzistojnë. Ekziston vetëm vjedhja e tmerrshme që vazhdon t’u bëhet shqiptarëve”,- tha Çupi.

Sipas saj, është koha që Prokuroria e Posaçme Antikorrupsion të mos flejë.///