Në 8 zona të jugut ka nisur procesi i regjistrimit fillestar të pronave

Drejtori i Përgjithshëm i Agjencisë Shtetërore të Kadastrës, Artan Lame tha se ” 212 mijë objekte janë legalizuar deri tani në shkallë vendi dhe kjo shifër është 10-fish më e lartë krahasuar me vitin 2013, ku gjetëm vetëm 21 mijë objekte të legalizuara”.

Gjatë një interviste televizive Lame u shpreh se, “në totalin kanë qenë 310 mijë objekte të deklaruara për proces legalizimi, nga të cilat 212 mijë janë legalizuar”.

Me ndryshimet në ligj shpjegoi ai, i është dhënë zgjidhje edhe një pjese tjetër të objekteve dhe vetëm 60 mijë objekte janë të palegalizueshme, për të cilat po punojmë t’i japim zgjidhje.

Duke u ndalur në procesin e legalizmit në zonën bregdetare të vendit, Lame tha se “në 8 zona të jugut të vendit, ka nisur procesi i regjistrimi fillestar të pronave dhe janë 13 mijë e 200 pasuri nga të cilat 3 mijë janë godina”.

Për herë të parë tha ai, ne kemi ndërtuar hartën e pronave në zonën bregdetar të vendit dhe kemi ndarë mbi 500 legalizime në fshatin Ilias dhe Borsh.