Kumbaro: S’do ta ndalim vrullin për pastrimin e territorit

Në të gjithë qarkun e Vlorës po zhvillohet një aksion pastrimi, në kuadër të Planit Kombëtar të Pastrimit.

Ministrja e Turizmit dhe Mjedisit, Mirela Kumbaro ndau sot pamje nga ky aksion, ndërsa theksoi se ai nuk do të ndalet në të gjithë territorin e vendit. “Tri ditë pastrimi intensiv në gjithë qarkun e Vlorës, aty ku nisëm Planin Kombëtar të Pastrimit 5 muaj më parë dhe që e vazhdojmë çdo ditë në gjithë territorin. Sezoni turistik fillon nga rrugët, plazhet, ambientet e përbashkëta të pastra, higjienike e që të kënaqin syrin”.

“Faleminderit të gjitha institucioneve dhe punonjësve që po i bashkohen këtij plani. S’do ta ndalim vrullin deri sa t’i kemi dhënë fund turpit të çibanëve në territor”, tha Kumbaro. Në aksionin e pastrimit në qytetin e Vlorës ditën e sotme morën pjesë edhe fëmijët.

“Na u bashkuan në Vlorë duke nisur nga pastrimi i oborreve të shkollave e deri tek ambientet e përbashkëta, sepse të mësojnë përgjegjësinë për mbetjet që vetë prodhojnë dhe dashurinë për ambientin është investimi më i sigurt për një Shqipëri të pastër”, tha Kumbaro.

Plani Kombëtar i Pastrimit rrënjësor të Shqipërisë nisi më 7 nëntor 2021 në Vlorë dhe po përfshin të gjitha qytetet e vendit.///