PD: Këshilli Kombëtar miraton rezolutë për procesin e zgjedhjes së presidentit

 Partia Demokratike mblodhi sot Këshillin Kombëtar, i cili miratoi një rezolutë për procesin e zgjedhjes së presidentit të ri të vendit.

Anëtari i Këshillit Kombëtar të PD-së, Oerd Bylykbashi lexoi rezolutën e miratuar nga Këshilli.

Sipas rezolutës së PD-së, mandatohet Komisioni i Përkohshëm i Rithemelimit të Partisë Demokratike të caktojë përfaqësuesit për gjetjen e një qëndrimi të përbashkët me partitë e tjera opozitare në procesin e zgjedhjes së presidentit të Republikës në Kuvendin e Shqipërisë

Ndërkohë, sipas rezolutës, çdo alternativë që mundëson zgjedhjen e presidentit me votat e Partisë Socialiste, apo të siguruara pa konsensus politik të vërtetë, do të refuzohet me votë në Kuvend.

“Partia Demokratike do të shprehë vullnetin e saj për zgjedhjen e presidentit të Republikës me votën e deputetëve të grupit të saj parlamentar, në çdo rast pa u bërë pjesë e farsave institucionale të mazhorancës socialiste. Mandatohet Komisioni i Përkohshëm i Rithemelimit të Partisë Demokratike të caktojë përfaqësuesit për gjetjen e një qëndrimi të përbashkët me partitë e tjera opozitare në procesin e zgjedhjes së presidentit të Republikës në Kuvendin e Shqipërisë”, thuhet në rezolutën e PD-së.

Më tej në rezolutë përcaktohet se në rast se në procesin politik dhe parlamentar të gjetjes së kandidaturave, krijohen kushtet për konsensus për votimin e presidentit nga kandidatë të propozuar nga opozita, mandatohen përfaqësuesit e Partisë Demokratike që bashkërisht me përfaqësuesit e tjerë të partive opozitare, të propozojnë kandidatë në raundet e përcaktuara nga Kushtetuta.

“Çdo alternativë që mundëson zgjedhjen e presidentit me votat e Partisë Socialiste, apo të siguruara pa konsensus politik të vërtetë, do të refuzohet me votë në Kuvend. Grupi parlamentar i Partisë Demokratike, në përputhje me Statutin e Partisë Demokratike dhe nenin 4 të Rregullores së grupit parlamentar, siguron zbatimin e qëndrimit politik të Partisë Demokratike të përcaktuar në këtë rezolutë. Çdo qëndrim që bie ndesh me këtë rezolutë detyruese dhe tagrat përfaqësuese politike të rrjedhur nga vendimet e organeve përfaqësuese të Partisë Demokratike, nuk përfaqësojnë Partinë Demokratike në procesin e zgjedhjes së presidentit”, thuhet në rezolutë.

Më 24 korrik 2022, mbaron mandati i Presidentit të Republikës. Kuvendi i Shqipërisë duhet të nisë procedurat për zgjedhjen e presidentit të ri jo më vonë se 60 ditë përpara fundit të mandatit.///