Memorie: 61 vjet më parë filloi ndërtimi i Murit të Berlinit

– Ambasada gjermane në Tiranë kujton sot 61-vjetorin e ndërtimit të Murit të Berlinit.

Muri i Berlinit qëndroi 28 vjet dhe ishte një nga ndërtimet më famëkeqe në botë: Muri ndau Berlinin Lindor dhe Perëndimor. 61 vjet më parë, më 13 gusht 1961, RDGJ filloi ndërtimin e murit. Fortifikimet kufitare ndanë jo vetëm familjet dhe miqtë, por u bënë gjithashtu një kurth vdekjeprurës për qindra njerëz.

“Për fat të mirë, muri është sot histori! Edhe në Tiranë gjendet një segment i murit në memorialin “Post-Bllok” si një simbol i lirisë që kujton Revolucionin Paqësor në Gjermani, i cili rrëzoi murin në vitin 1989”, shkruan në postimin në rrjetet sociale Ambasada gjermane në Tiranë.

Vendimi i qeverive të Traktatit të Varshavës për të mbyllur zonën lindore të qytetit, me qëllim shmangien e gjakderdhjes (1,6 milionë banorë të Berlinit ishin larguar tashmë nga lindja për në perëndim), u bë përfaqësimi i prekshëm i “Perdes së Hekurt”, që ndau botën në dy blloqe, nën ndikimin sovjetik dhe nën atë amerikan, gjatë Luftës së Ftohtë.

Pasojat e asaj zgjedhjeje ndanë për dekada të tëra familjet e miqtë dhe u kushtoi jetën shumë gjermanëve, të cilët u përpoqën të arratiseshin në mënyra gjithnjë e më të rrezikshme.

Të paktën 140 ishin viktimat e Murit, të vrarë nga “të shtëna precize” të agjentëve nga lindja.

Historia e origjinës së atij kufiri, i shndërruar shpejt në blloqe betoni, tregohet përmes imazheve tashmë ikonike.///