PD, Bumçi: “Ballkani i hapur” i shërben pushtetit personal të Ramës dhe Vuçiç

Anëtari i kryesisë së PD, Aldo Bumçi duke iu referuar një studimi të fundit të Institutit “Rockefeller” mbi “Ballkanin e hapur”, tha se “rikonfirmon alarmin e ngritur nga Partia Demokratike se, kjo nismë synon t’i shërbejë pushtetit personal të Edi Ramës dhe Aleksandër Vuçiç”.

Më shume se kaq, sipas Bumçit, në studim theksohet se është pjesë e axhendës së tyre të përbashkët për ta mbajtur rajonin jashtë Bashkimit Europian, thekson studimi.

Ai u shpreh se në po këtë studim, nxirret zbuluar fakti se kjo nismë nuk lindi prej frustrimit të 6 vendeve ndaj politikës së zgjerimit të BE, sikundër duan ta shesin Rama dhe Vuçiç.

“Studimi nxit edhe më tej dyshimet mbi axhendën e fshehtë të kësaj nisme, kur evidenton se Bosnje Hercegovina e refuzon pjesëmarrjen në “Ballkanin e hapur” për shkak se i trembet cënimit të pavarësisë së saj. Ky vend, bashkë me Kosovën e Malin e Zi, e shohin “Ballkanin e hapur” si rrezik që minon rrugën e tyre europiane”, tha Bumçi.///