Klosi drejtues politik i PS-së në Vlorë, Gjiknuri: Do të vazhdojë punët e mira

 Sekretari i Përgjithshëm i Partisë Socialiste, Damian Gjiknuri prezanto para strukturave drejtuesin e ri politik të qarkut të Vlorës, Blendi Klosi. Në një komunikim me mediet, Gjiknuri theksoi se me eksperiencën e tij të gjatë politike, Klosi do të vazhdojë punët e mira të nisura për sa i përket mirëmenaxhimit dhe mirorganizimit politik të këtij qarku.

Sipas tij, “këto janë lëvizje normale përpara fushatave zgjedhore, ku secili merr pozicionin e tij si lojtar, që ekipi të japë maksimumin”. Gjiknuri bëri të ditur se shumë shpejt PS do të fillojë procedurat për vlerësimin e të gjithë kryetarëve saj në të gjitha bashkitë e vendit.

“Shumë shpejt, ne do të fillojmë procedurat për vlerësimin e të gjithë kryetarëve tanë të bashkisë, në të 61 bashkitë e vendit. Nuk do të jetë struktura e partisë që do të bëjë vlerësimin, por do të jetë ajo çfarë ata kanë dhënë për qytetet që kanë drejtuar dhe sesi qytetet kanë mirëpritur ose jo, drejtuesit e mandatuar nga Partia Socialiste. Të marrësh një mandat nga Partia Socialiste është jashtëzakonisht respekt dhe sidomos në Vlorë”, tha ai.

Ndërsa Klosi, i cili mban njëkohësisht dhe detyrën e Sekretarit Organizativ në Partinë Socialiste, u shpreh se marrja e besimit për të drejtuar qarkun e Vlorës është një përgjegjësi e shumëfishtë për të arritur rezultate. “Për këdo socialist është një nder i madh ta bëjë jetën e partisë këtu, në Vlorë. Pa dyshim si drejtues politik i qarkut është një përgjegjësi e shumëfishtë, për të arritur të njëjtat rezultate, që kjo parti ka arritur gjatë gjithë periudhës së posttranzicionit. Një parti, e cila ka dëshmuar që gjithmonë ka arritur t’ia dalë të jetë e suksesshme, sepse ka qenë bashkë. Misioni që më është ngarkuar është që kjo parti të jetë e bashkuar, të jetë pranë qytetarëve, të ketë mundësinë që të diskutojmë problematikat që ka çdo banor i qarkut të Vlorës. Si qark i madh, ka nevojë për shumë punë. Po ashtu, si pasojë e të gjitha rezultateve pozitive na del si detyrë, që jo vetëm të strukturojmë punën e Partisë Socialiste, por të jemi së bashku me qytetarët”, tha ai.///