Përmbytjet, Verdho i KESH: E njëjta situatë me 2010 por dëmi në terren vetëm 10 %

Korporata Elektroenergjetike Shqiptare (KESH) bën të ditur se niveli i reshjeve që ka përfshirë vendin tonë gjatë këtyre ditëve të fundit, është i njëjtë me ato që shkaktuan përmbytjet masive në vitin 2010, por impakti i përmbytjes sot është sa 10% i asaj kohe.

Drejtori i KESH-it, Ergys Verdho deklaroi në një intervistë televizive, se “situata e reshjeve që paraqitet sot në vendin tonë, është identik skenari i 2010-ës”. Sipas tij, në Vaun e Dejës ekzistonin 3200 metër kub ujë për sekondë në 2010 dhe shkarkimet kanë qenë 107% e prurjeve natyrale.

“Pra janë shkarkuar rreth 340 metër kub për sekondë në fushë Shkodër. Impakti ka qenë shumë i madh në humbje hektarësh, diku rreth 14 mijë hektarë. Sot ne kemi të njëjtin skenar me 3500 metër kub për sekondë prurje natyrale. Kemi shkarkuar rreth 35-40% të prurjeve natyrale dhe pjesën tjetër e kemi çuar në rezervë energjetike”, deklaroi Verdho, teksa vuri në dukje se, “ky quhet menaxhim”.

“Është identik skenar i 2010-ës dhe impakti është 10% nga ai i 2010-ës”, tha ai.///