Gazetari dhe publicisti i njohur Nebil Çika ndahet papritur nga jeta

Gazetari dhe publicisti i njohur Nebil Çika ndahet papritur nga jeta

Familjarët e gazetarit Nebil Çika kanë bërë të ditur lajmin e trishtë për ndarjen e papritur nga jeta të tij.

Nebil Çika i përkiste një familje të njohur patriotike dhe intelektuale nga Borshi i Bregut të Detit. I përndjekur familjarisht gjatë regjimit komunist, Nebil Çika ka qenë gazetar që prej fillimeve të viteve ’90-të. Vitet e fundit ai drejtoi një organizatë të ish-të përndjekurve politikë.

Çika pati marrëdhënie me shumë media në hapësirën shqiptare. Në fillimet e veta ai punoi si reporter i kronikës e më pas gazetar politik në shumë media të vendit si ” Standart”, ” RD” etj, si dhe botues i gazetës “Minerva”, që mbante emrin e gazetës ku shkruante Nebil Çika i vjetër, një nga intelektualët e publicistët më të njohur të fillimit të shekullit 20.

Lajmi për ikjen e parakohshme të kolegut Nebil Çika ka tronditur gjithë mjedisin mediatik, miqtë dhe kolegët e tij të shumtë, por edhe politik ku ai ishte i angazhuar. Unioni i Gazetarëve Shqiptarë i përcjell familjes Çika ngushëllimet për humbjen e njeriut të dashur.

I paharruar mbetesh kolegu ynë Nebil Çika!

Unioni i Gazetarëve Shqiptarë.///