Tavo: Në tre muaj zgjidhëm problemet e banorëve të Himarës

Nga Klodi SARAÇINI

Kryetari i bashkisë së Himarës, Vangjel Tavo tha sot se gjatë periudhës tre mujore ne krye të bashkisë së qytetit bregdetar kanë qenë punë intensive për realizmin e kërkesave të banorëve. Në një prononcim për mediet, Tavo theksoi se qëllimi i bashkisë është që të jetë tërheqëse gjatë 12 muajve të vitit dhe jo vetëm gjatë sezonit veror turistik.

Në këtë bashki pak ditë më parë u përmbyll edhe shpërndarja e certifikatave të pronësisë , i cilësuar si një proces shumë i rëndësishëm për Himarën.

“Certifikimi i banesave të vjetra para ’90 konsiderohet i mbyllur duke vazhduar deri në momentin që edhe qytetari i fundit të marrë certifikatën padyshim”, tha Tavo duke e cilësuar këtë proces të mbyllur.

Kryebashkiaku Tavu u shpreh se “ndërkohë po vijon procesi për dhënien e certifikatave të pronësisë për banesat e ndërtuara pas ’90 , ku pas një vendimi të Këshillit të Ministrave bashkia e Himarës ka angazhuar në terren dhe në Agjencia Shtetërore e Kadastrës e Vlorës dhe Sarandës një numër punonjësish për të përshpejtuar procesin”. Bashkia e Himarës ka miratuar edhe buxhetin për vitin 2025, ku prioritet mbeten  investimet në infrastrukturë, të cilat do të shtrihen në të gjithë territorin e kësaj bashkie.///