Avakati i Popullit, rikthehet nesër në Sarandë me ‘Ditën e Hapur’.

Institucioni i Avokatit të Popullit organizon nesër në Sarandë një “DITË TË HAPUR!” për qytetarët me pjesëmarrjen e ekspertëve të ardhur nga Tirana të cilët do të jenë të gatshëm të dëgjojnë dhe shqyrtojnë shqetësimet dhe ankesat e qytetarëve të Sarandës dhe të rajonit përfshi edhe qytetarë nga bashkitë fqinje Konispol, Delvinë e Finiq.

Sipas burimeve nga Zyra Rajonale e Avokatit të Popullit në Sarandë, ekspertët e Institucionit nga Sektori i Administratës, do të fokusohen kryesisht në çështje të pronësisë, por janë gjithashtu të hapur për të trajtuar çdo problematikë tjetër që lidhet me të drejtat e njeriut.

Përfaqësuesi i Zyrës Rajonale në Sarandë, Arben Guga vuri në dukje për SARANDANEWS.AL se “Dita e Hapur nis të Martën, datë 15 korrik në orën 11.00 në një mjedis brenda godinës së Bashkisë Sarandë.”

Pak ditë më parë Institucioni i Avokatit të Popullit organizoi në Sarandë “DITËN E HAPUR” ku specialistët dëgjuan dhjetra qytetarë lidhur me ankesat dhe shqetësimet e hasura kryesisht mbi çështje të pronësisë të cilat zvarriten prej vitesh nga institucione të ndryshme publike vendore përfshi zyrat e Kadastrës Shtetërore, bashkitë, ,etj/SARANDANEWS.AL///