Athinë. Hap i ri i Ambasadës shqiptare në fushën ekonomike me Qipron

Në zbatim të agjendës së #DiplomacisëEkonomike2025, në ambientet e Ambasadës së Qipros në Athinë u zhvillua një takim konstruktiv mes Diplomates Ekonomike të Ambasadës sonë, znj. Joana Zhonga dhe Këshilltarit Tregtar të Ambasadës së Republikës së Qipros, z. Joseph Kypraios.

Burime nga Ambasada e Shqipërisë në Athinë vunë në dukje se “Në vijim të vullnetit të përbashkët të shprehur edhe gjatë vizitave respektive të dy Ministrave të Punëve të Jashtme, diskutimi u përqëndrua në hapat konkretë për forcimin e bashkëpunimit ekonomik dhe tregtar mes Shqipërisë dhe Qipros, përmirësimin e kuadrit ligjor, nxitjen e investimeve në sektorë prioritarë, si dhe krijimin e partneriteteve të reja ndërbiznesore, në përfitim të ekonomive të të dy vendeve.”

Sipas të njëjtave burime, Qipro renditet në vendin e 13-të të investitorëve më të mëdhenj në Shqipëri me një stok prej 306 milionë euro (T1 2025) dhe në vendin e 10-të për sa i përket fluksit të investimeve, për tremujorin e parë të vitit 2025.

“Në prag të Presidencës së saj të ardhshme të BE-së, në gjashtëmujorin e parë të vitit 2026, rishprehim mirënjohjen për mbështetjen që Republika e Qipros ofron në procesin e integrimit evropian të Shqipërisë dhe angazhimin për të thelluar lidhjet mes dy vendeve.” theksoi pas këtij takimi të rëndësishëm Joana Zhonga , Diplomate ekonomike e Ambasadës së Shqipërisë në Kryeqytetin helen, Athinë. /SARANDANEWS.AL.///