GREQI – Mjekët në grevë për shkak të situatës së mjerueshme në spitalet publike

ATHINË, 7 nëntor/ AFP/- Mjekët në Greqi u mblodhën sot në Athinë, në ditën e dytë të grevës për të denoncuar situatën, sipas tyre, të mjerueshme në spitalet publike si për stafin ashtu edhe për pacientët.

“Pacientët po vuajnë. Jetët e tyre janë në rrezik nga mangësitë e sistemit spitalor publik, pavarësisht përpjekjeve mbinjerëzore të stafit”, deklaroi Federata Panhelenike e Punonjësve të Spitaleve Publike (POEDHN).

Duke iu përgjigjur në veçanti thirrjes nga Federata e Mjekëve të Spitaleve të Greqisë (OENGE), mjekët dhe punonjësit e kujdesit shëndetësor në spitalet publike u mblodhën për të protestuar para Ministrisë greke të Shëndetësisë.

Ata synojnë të denoncojnë mungesat e rënda të stafit në institucionet publike, të cilat sipas POEDHN, shkaktojnë humbjen e interesit nga profesionistët e rinj për shkak të pagave të ulëta dhe kushteve të vështira të punës.

Sektori i shëndetit publik, përfshirë spitalet, pësoi shkurtime të rënda buxhetore në Greqi gjatë krizës financiare (2008-2018).

Mungesa kronike e financimit denoncohet gjerësisht nga sindikatat. Shpenzimet aktuale për kujdesin shëndetësor arrijnë vetëm 8,5% të PBB-së në Greqi, më pak se mesatarja e Bashkimit Evropian prej 10,4%, sipas statistikave të vitit 2022.

“Ajo që është vërtet e mjerueshme është realiteti që po përjetojmë sot si punonjës të kujdesit shëndetësor, por edhe ajo që po përjetojnë pacientët”, theksoi Yiannis Galanopoulos, president i Federatës së Sindikatave të Mjekëve të Spitaleve të Greqisë (OENGE)./ (Artan JORGAQI)///