Info PLUS. Dita Botërore e Rojeve Mjedisore.

 Në Ditën Botërore të Rojeve Mjedisore vlerësohet përkushtimi dhe angazhimi i të gjithë rojeve mjedisore, pjesë e Agjencisë Kombëtare të Zonave të Mbrojtura, të cilët çdo ditë ia dedikojnë natyrës dhe mbrojtjes së saj.

Kryeministri Edi Rama ka publikuar në rrjetet sociale mesazhet e Genta Blini, roje mjedisore në Parkun Kombëtar Alpet e Shqipërisë si dhe Irma Sterkaj, roje mjedisore në rezervatin natyror të menaxhuar “Liqeni i Shkodrës”.

“Mesazhet kuptimplota të Gentës dhe Irmës nga zonat tona të mbrojtura, si simbol se natyra bëhet edhe më e bukur kur pjesë e përkujdesjes për të janë gratë, pa dyshim me kontributin e secilit prej nesh për ta ruajtur këtë pasuri të përbashkët”, shprehet Rama.

Genta Blini një zë i natyrës ne zemër të Thethit shprehet se të jesh roje mjedisore “është një përgjegjësi e madhe një privilegj i rrallë”.

“Gjatë punës time të përditshme informoj turistët për shtigjet dhe monumentet natyrore. E veçanta e kësaj është që ata më tregojnë për eksperiencat e tyre nga këto shtigje dhe nga majat e Ballkanit. Ku natyra flet ne dëgjojmë dhe si roje të saj veprojmë për ta mbrojtur”, shprehet Genta si dhe i fton të gjitha vajzat dhe gratë të bëhen pjesë e stafit të Zonave të Mbrojtura.

Irma Sterkaj shprehet se kjo është një punë që e bën me shumë përkushtim duke kujtuar se “gjatë monitorimit të zonës shpesh kthehem në kujtimet e fëmijërisë ku vinim xhiro me biçikleta dhe prisnim perëndimin e diellit”.

Ajo uron të gjithë koleget e saj për këtë punë fisnike në mbrojtje dhe promovimit të pasurive natyrore të vendit tonë. (Almarina GEGVATAJ).///