Kulturë. U çel në Sarandë ekspozita e piktorit vlonjat Roland Runaj

Në galerinë e arteve pamore “ART Saranda ” mbrëmjen e së premtes u çel në Sarandë ekspozita e piktorit vlonjat Roland Runaj.

Në ceremoninë e përurimit ishin të pranishëm dhjetra artdashës, njerëz të fushave të ndryshme të artit, shkrimtarë dhe artistë, zyrtarë të Bashkisë, etj,.

Në emër të Bashkisë, Ekspozita u përshëndet nga drejtori i Qendrës Kulturore , Ismail Murtaj.

Piktori Lefter Çeko, drejues i Galerisë dhe kurator i Ekspozitës, vuri ne dukje se Roland Runaj i takon atij brezi artistësh pamorë të cilët janë shkolluar vitet e fundit jashte vendit.

“Ekspozita, është fryt i një bashkëpunimi një vjecar me Galerinë dhe drejtorinë e kulturës dhe vjen nga autori si përthyerje e memories për qytetin e Sarandës, duke shpalosur emocione nga antikiteti, deri ne ditët e kohëve moderne”,- tha Çeko.

Me cilësinë e kuratori, Çeko veçoi dinamikën e pikturimit, dritën dhe motivet nga qyteti bregdetar në kompozimet e Roland Runajt, si shprehje e stilit të tij të veçantë, me gjetjet origjinale, përthyerjet, udhëtimet në kujtesë, etj,.

Gjatë fjalës përshëndetëse autori Roland Runaj, u ndal në dedikimin e kësaj Ekspozite për qytetin e Sarandës dhe motivet që e kanë tërhequr dhe frymëzuar.

“Pikturat dhe përgjithësisht kompozimet e mia, janë sipërfaqe kujtese miksuar me përjetimet e mia dhe përthyerjet shpirtërore me një shtrirje të gjatë nga antikiteti në ditët e sotme,”-u shpreh Runaj në Sarandë.

Ekspozita do të qëndrojë e çelur për tridhjetë ditë dhe pritet që tërheqë vëmendjen e qindra banorëve, rretheve artdashëse dhe mijëra turistëve që po e frekuentojnë Sarandën këto ditë pranvere./SH.Hajno-SARANDANEWS.AL///