Menaxhimi i Butrintit, Zhupa: Përfitime ekonomike në kurriz të trashëgimisë kulturore

 Partia Demokratike reagoi sërish sot lidhur me menaxhimin e Parkut Kombëtar të Butrintit.

Deputetja e PD-së, Ina Zhupa deklaroi se “5 milionë dollarë që propagandohen si “bamirësi” për Parkun e Butrintit nga fondacioni, nuk janë gjë tjetër veçse paratë fillestare qe i duhen vetë fondacionit për të ndërtuar struktura si qendër vizitorësh, bare, restorante që më pas do i përdorë për përfitime ekonomike dhe në kurriz të trashëgimisë kulturore”.

Sipas Zhupës, “në marrëveshje tregohet që: ‘Nevojitet një investim total kapital prej 7.5 milionë USD, ku 39% e të cilit do të shpenzohet për konservimin e sajtit dhe 61% për ndërtimin e strukturave të reja për vizitorët dhe stafin’”.

“Pra 2.9 milionë dollarë i duhen sitit edhe sipas vetë marrësve të konçensionit për konservimin e tij. 4.6 milionë dollarë duhen për ndërtimet e reja nga të cilat do shkatërrohet parku, por do pasurohet privati! Pra privati nuk dhuron asgjë, thjesht fut shumën e investimit në një biznes të ri shumë fitimprurës për veten e tyre. Aktualisht Butrinti ka në arkën e tij 2 milionë dollarë, që janë mjaftueshëm për të bërë konservimin e sitit dhe plus të paktën 1.5 milionë dollarë që janë minimumi nga te ardhurat e pritshme deri në fund 2022, edhe pa ndryshuar çmimet e biletave siç parashikon fondacioni”, tha ajo.///