Rama në Bari, homazhe në përkujtimoren e Luigj Gurakuqit

Kryeministri Edi Rama bëri sot homazhe në përkujtimoren e vendosur në vendin ku humbi jetën shqiptari i madh Luigj Gurakuqi, në Bari.

Luigj Gurakuqi, një nga figurat e shquara të historisë politike e kulturore shqiptare, hartues dhe nënshkrues i Deklaratës së Pavarësisë së Shqipërisë, u vra në Bari, në 2 mars 1925.

Kryeministri Rama po vijon vizitën zyrtare në Itali, në kuadër të 30-vjetorit të mbërritjeve të para të shqiptarëve në brigjet italiane në vitin 1991.

Në ditën e dytë të qëndrimit në shtetin fqinj, kryeministri Edi Rama ndodhet sot në Pulja, ndërkohë që dje u prit nga ministri i Punëve të Jashtme të Italisë, Luigi Di Maio dhe presidenti i rajonit të Pulias, Michele Emiliano.

Po ashtu, Kryeministri Rama mori pjesë dje në Bari, Itali, në çeljen e një ekspozite të organizuar në përkujtim të eksodit të shqiptarëve në vitin 1991.

Në fillim të marsit 1991 mijëra shqiptarë u larguan nga vendi, duke shfrytëzuar anijet e ankoruara në kalatat e portit më të madh të Shqipërisë.

Vetëm në javën e parë të atij viti, në portin e Brindizit (Itali) janë ankoruar 24 mjete lundruese të madhësive të ndryshme, me një numër të jashtëzakonshëm njerëzish nga Shqipëria.