Shuhen vatrat e zjarrit në Delvinë dhe Finiq

Vatrat e zjarrit në territorin e bashkive Delvinë dhe Finiq janë shuar, pas ndërhyrjes së koordinuar të strukturave të Mbrojtjes Civile, Forcave të Armatosura dhe mbështetjes ajrore.

Sipas Agjencisë Kombëtare të Mbrojtjes Civile, ndërhyrja e shpejtë dhe angazhimi i të gjitha strukturave në terren mundësuan izolimin dhe shuarjen e plotë të zjarrit, duke shmangur përhapjen e flakëve drejt zonave të banuara dhe duke mbrojtur fshatrat Vllahat, Kostar dhe Mesopotam.

Ndërkohë, shefi i shtabit të përgjithshëm të Forcave të Armatosura, Arben Kingji, shprehu mirënjohjen për punën e kryer nga pilotët e Forcës Ajrore dhe efektivët e angazhuar në terren gjatë operacionit për izolimin dhe shuarjen e zjarrit.

Kingji vlerësoi profesionalizmin, përkushtimin dhe gatishmërinë e Forcave të Armatosura në përballimin e situatave emergjente, duke theksuar kontributin e tyre në mbrojtje të komuniteteve dhe pasurisë natyrore.

Agjencia Kombëtare e Mbrojtjes Civile informoi se në terren u angazhuan forcat zjarrfikëse nga Delvina, Finiqi dhe Konispoli, 60 vullnetarë, 40 forca të Forcave të Armatosura, si dhe Forcat e Armatosura me tre helikopterë, 2 “Cougar” dhe 1 “Black Hawk”.(Ermira ISUFAJ)///