Situata nga zjarret, Basha: Qeveria e papërgatitur, banorët në zonat e rrezikuara të largohen

Kreu i PD-së, Lulzim Basha ka reaguar pas humbjes së jetës së një banori si pasojë e zjarrit në fshatin Asim Zeneli të njësisë administrative Lunxhëri në Gjirokastër.

“I shpreh ngushëllimet familjes së Andrea Haxhiaj që humbi jetën sot si pasojë e zjarrit në zonën e Gjirokastrës. Masat gjysmake të qeverisë nuk e kanë normalizuar dot situatën alarmante të shkaktuar nga zjarret e ditëve të fundit në vend”, shprehet Basha.

Kreu i PD-së thekson se “pavarësisht paralajmërimeve të qytetarëve dhe medias, në shumë zona zjarret vijojnë prej ditësh, ndërsa angazhimi i vetëm i qeverisë ka qenë përpjekje me mjete rrethanore të papërshtatshme dhe servirja e videove të zyrës së propagandës. Si në rastin e tërmetit, emergjencat civile dhe qeveria ndodhen totalisht të papërgatitura për t’u ardhur në ndihmë qytetarëve dhe për të shmangur pasojat e katastrofave natyrore”.

“Përgjegjësi i kësaj situate vijon turet e inaugurimeve false duke lënë në mëshirë të fatit banorët dhe qindra hektarë që po digjen prej ditësh. Është momenti që çdokush që ndodhet në zonat e rrezikuara nga zjarri të largohet dhe të kujdeset për jetën. Forcat e emergjencës që ndodhen në terren të marrin masa urgjente që brenda mundësive të sigurojnë jetën e banorëve të rrezikuar dhe të shmangin përhapjen e mëtejshme të zjarreve”, u shpreh Basha në reagimin e tij.///