Tymueset në Kuvend, Balla: Deputeti nuk mund t’i shmanget ligjit, dëmtimi i pronës dënohet nga Kodi Penal

Ministri i Brendshëm, Taulant Balla reagoi sot ndaj ngjarjeve në seancën plenare të Kuvendit, ku deputetë të opozitës bllokuan foltoren dhe hodhën tymuese. Deputeti Flamur Noka u ka vënë flakën letrave, ndërsa tentoi t’u vinte zjarrin edhe karrigeve të grumbulluara në foltore.

Balla u shpreh se Kodi Penal përcakton qartësisht në nenet 151 dhe 154 veprat penale të shkatërrimit/dëmtimit me dashje të pronës me zjarr dhe me mjete të tjera, të cilat dënohen deri në pesë vite burg.

“Ndërsa këto akte të rënda janë referuar në mënyrë të përsëritur në Prokurori, institucioni i akuzës duhet të garantojë se ligji zbatohet njëlloj për të gjithë dhe deputeti nuk mund t’i shmanget ligjit kurrsesi, duke përfituar apo duke u fshehur pas imunitetit”, u shpreh Balla në reagimin e tij.///