PD kallëzon në SPAK 5 ish-funksionarë për përdorimin e vulës dhe simboleve

Partia Demokratike kallëzon në SPAK përfaqësues të lëvizjes Berisha për falsifikimin e vulës së PD-së.

Të kallëzuarit në SPAK janë deputetët Belind Këlliçi, Edmond Spaho, Albana Vokshi, si dhe Ivi Kaso e Ervin Minarolli.

Sipas PD-së, ata akuzohen për veprën penale “Falsifikimi i vulave, i stampave ose i formularëve” i kryer në bashkëpunim, parashikuar nga neni 190 paragrafi i 2 dhe 25 i Kodit Penal. Në kallëzim drejtuar SPAK-ut thuhet se këta janë persona që kanë pasur funksione në PD, kanë dijeni për rregullat e statutit, dhe e kanë kryer veprën penale të përdorimit të vulës dhe simboleve për të realizuar qëllimet e tyre, pavarësisht se ishin në dijeni të pasojave ligjore.

“PD e ka depozituar kallëzimin në SPAK, pasi 3 nga të kallëzuarit janë deputetë të Kuvendit të Shqipërisë”, thuhet në njoftim./atsh///