Rama: PD thika në shpinën e Kosovës, zanafilla e raportit të Dick Marty-t vota pro e tyre

Kryeministri Edi Rama deklaroi sot se Partia Demokratike e përdor Kosovën sa herë ka kriza brenda vetes.

Gjatë diskutimeve në seancën e sotme plenare të Kuvendit të projektrezolutës së propozuar nga Partia Socialiste “Mbi bazueshmërinë e pretendimeve për trafikimin e paligjshëm të organeve në Kosovë e Shqipëri”, Rama tha se Partia Demokratike përdor viktimat e Kosovës për të kaluar krizën që ka vetë.

“Është sa e thjeshtë, aq edhe e neveritshme pse e bëni këtë ju! Për të njëjtën arsye që u kujtuat për gjenocidin në Srebrenicë, kujtoheni për gjenocidin në Kosovë dhe po të shikosh të gjithë historinë e deklaratave dhe rezolutave, shikon dhe ndryshimin si nata me ditën mes jush dhe nesh, mes asaj që quhej Partia Demokratike e Shqipërisë, dhe tani nuk e di si quhet, dhe ne që quhemi Partia Socialiste e Shqipërisë. Sa herë ka patur një krizë që ju është dashur ta kapërceni, keni futur mes viktimat e Kosovës. Sa herë ju është dashur të nxirrini nga axhenda probleme të caktuara, merrini e shikojeni, ju e dini më mirë historinë e partisë suaj edhe në opozitë dhe në qeveri, dhe merrni e shikoni se si përkojnë me rezolutat dhe me deklaratat për Kosovën kjo histori, pa lidhje fare”, u shpreh Rama.

“Zgjoheni ju në 2022 dhe kujtoheni për Srebrenicën?! S’keni lidhje fare ju me Srebrenicën! Ju jeni gati t’i rizhvarrosni edhe një herë, dhe t’i rifusni nga e para në varrin masiv ata atje, për t’i thënë kujt të mundeni që socialistët nuk duan. Ju jeni gati ta bëni lëmsh edhe një herë nga e para politikën ndërkombëtare të Shqipërisë për të ardhur këtu dhe për të shitur këto dënglat që dëgjuam”, theksoi Kreu i Ekzekutivit.

Rama u shpreh se sa të jetë Partia Socialiste në pushtet nuk do të ndërmarrë hapa pa dakordësinë e aleatëve që mundësuan që Kosova të jetë shtet i pavarur dhe demokratik.

“Cilin gjenocid doni ju të aprovojë Parlamenti i Shqipërisë, meqë thoni keni frikë? E keni harruar ju? Unë s’e kam harruar për vete, ne nuk e harrojmë që ai shtet i lirë dhe sovran, demokratik, është krijuar nga ata, pa të cilët as ju, as ata në Prishtinë, nuk duhet të bëjnë asnjë hap, asnjë hap. Në qoftë se ju dhe ata në Prishtinë doni të bëni hapa të tillë, bëjini. Po për sa kohë do të jemi ne që qeverisim këtë vend, ne nuk do t’i bëjmë. Sepse përpara sa të kuturisemi ne të ndërmarrim një hap të tillë në 2022-shin për të zgjidhur problemet midis ‘foltores’ dhe ‘gojores’ duhet dakordësia e aleatëve tanë, se nuk mund të bëhemi ne si ‘foltorja’ dhe si ‘gojorja’ në sy të botës dhe në sy të asaj bashkësie demokratike pa të cilën nuk do të kishte Kosovë fare, as të pavarur, as demokratike, as autonome. Këta jeni ju! U miratua rezoluta për Srebrencën apo nuk u miratua? U miratua. Por kur u miratua? U miratua atëherë kur ishte planifikuar të miratohej, në ditën e Srebrencës, jo në ditën e ‘foltores’ dhe të ‘gojores’. S’keni ç’i bëni gomarit mbrapa këtu dhe vini t’i bini samarit, dhe për samar doni të përdorni Kosovën”.

Sipas tij, zanafilla e raportit të Dick Marty-t është vota e Partisë Demokratike në Këshillin e Evropës.

“Zanafilla e raportit të Dick Marty-t është vota e Partisë Demokratike në Këshillin e Evropës, përkundër votës së Damian Gjiknurit dhe Shpëtim Idrizit kundër raportit të Dick Marty-t. Dick Marty-t ia keni hapur rrugën ju. Po kështu, hajdeni këtu dhe thoni se çfarë mendoni për Hashim Thaçin, është mirë aty ku është në burg? Këto shikoni ju, sepse thikat që ju i keni ngulur Kosovës nga dita e parë duke e masakruar UÇK si terroristë, e si marksistë-leninistë, e dreqi me të birin, deri në ditën e fundit, duke e ngritur thikën e duke ia ngulur mu në gjoks presidentit të Kosovës, i përkasin historisë. Ju as nuk i shlyeni dot, as nuk i zhbëni dot, as nuk i mbuloni dot. Historia do të tregojë se ju patriotët e mëdhenj jeni në fakt thika në shpinën e Kosovës dhe kështu keni qenë gjithmonë, dhe kështu do të mbeteni, sepse bishti i shtrembër nuk drejtohet”, deklaroi Rama.///