Politika fiskale efikase për blegtorinë, diskutime me sipërmarrës të fermave

Nga Eleva XHAJANKA 

Hartimi sa më efikas i politikave fiskale për blegtorinë, me synim mbështetjen e prodhimit vendas mblodhi sot në një tryezë diskutimi ministren e Bujqësisë dhe Zhvillimi Rural, Frida Krifca, ministren e Financave dhe Ekonomisë, Delina Ibrahimaj me sipërmarrës të fermave blegtorale nga i gjithë vendi.

Në tryezë, diskutimi u përqendrua edhe tek propozimi për heqjen e taksës së hirrës dhe kremit të qumështit për të lehtësuar prodhuesit dhe tregtarët e këtyre produkteve.

Ministrja Krifca ndau në rrjete sociale foto nga ky takim i rëndësishëm, teksa shkroi se “me ministren Delian Ibrahimaj dhe një përfaqësi të fermave blegtorale nga e gjithë Shqipëria diskutuam mbi ndikimin e politikave fiskale në blegtori dhe zinxhirin prodhues e përpunues duke siguruar blegtorët për transparencë të këtyre politikave dhe për mbështetje”.

“Diskutuam me ta gjithashtu dhe politikën mbështetëse për blegtorinë për këtë vit, të cilën, po e ndërtojmë në funksion të nevojave të sektorit por edhe duke dëgjuar ngushtësisht grupet e fermerëve e blegtorëve”, theksoi ministrja.

Ndërkaq, në takim është folur edhe për ndërtimin e mekanizmave rregullatorë në lidhje me politikat fiskale dhe Skemën Kombëtare të Mbështetjes, për të siguruar bashkëpunimin e mirë mes palëve dhe zhvillimin me hapa të sigurt të Blegtorisë, me qëllim final produkt më të sigurtë dhe cilësor për konsumatorin si dhe zgjerimin e eksporteve të sektorit në tregje të reja ndërkombëtare.///