Berisha: Vazhdojmë revolucionin, deri në fitoren përfundimtare

Kreu i Partisë Demokratike, Sali Berisha zhvilloi një takim me strukturat e degëve 8,9 dhe 10 në Tiranë.

Gjatë takimit me strukturat e PD-së, Berisha u shpreh se, “korrupsioni qeveritar shqiptar, me korrupsionin ndërkombëtar, luftuan forcën politike pro-perëndimore të Shqipërisë”.“Ne jemi në një betejë të pashembullt që nga viti 1991. Në vitin 1991 ne përballeshim me një monizëm të bazuar në luftën e klasave, doktorinën Marksiste-Leniniste si bazë e saj. Ne sot përjetojmë një monizëm të bazuar në krimin, sundimin e krimit, të drogës dhe korrupsionit. Ndoshta kurrë ndonjëherë në Evropë nuk ka pasur një zhvillim si zhvillimet e fundit në Shqipëri, ku korrupsioni qeveritar shqiptar, me korrupsionin ndërkombëtar u bënë një, për të luftuar, asgjësuar forcën politike pro perëndimore të Shqipërisë. Për të luftuar, asgjësuar forcën politike e cila në pushtet luftoi me zero tolerancë krimin, luftoi me një betejë të vendosur korrupsionin. Në opozitë vazhdoi denoncimin e të gjitha vjedhjeve, lidhjeve të qeveritarëve me krimin. Për këtë qëllim kjo forcë opozitare duhej heshtur, asgjësuar, arkivuar”, tha ai.

Po ashtu, Berisha tha se, “presione të jashtëzakonshme u bënë mbi anëtarësinë e PD.

Por, shtoi ai, “duhet të pranojmë, një sintonizim kjo, jo vetëm i kësaj qeverive, të bazuar në krimin, drogën, por edhe në aleatët e tyre të korruptuar, diplomatë të korruptuar, zyrtarë, parlamentarë të korruptuar, të cilët lëshonin deklarata mbështetëse për ta”.

“Shqiptarët këto vite të pashembullta për Evropën, për vendet e lira, kanë dëgjuar deklarata mbështetëse për krim-ministrin e tyre Edi Rama, më shumë se të gjitha kohërat, se ato shiteshin dhe bliheshin haptas në tregun e korrupsionit. Por lavdi Zotit, ne sot jemi në këmbë dhe më të vendosur se kurrë në fitoren tonë. Përsëri, kjo amalgamë korruptive e korrupsionit shqiptar, me atë ndërkombëtar, përpiqet të mbahet, të rezistojë, përpiqet të mashtrojë shqiptarët prap, por ju garantoj ju se të ardhme nuk kanë. E ardhmja është e atyre që i besojnë transparencës, atyre që guxojnë të mbrojnë të vërtetat. Ne kemi guxuar dhe do të vazhdojmë revolucionin tonë deri në fitoren përfundimtare”, tha Berisha.///