Bajram Begaj betohet si President: Nevojitet unitet më shumë se çdo herë

Bajram Begaj u betua sot në Kuvend si President i Republikës, post të cilin do ta mbajë për 5 vitet e ardhshme. Kuvendi u mblodh në orën 18.00 në seancë të jashtëzakonshme për betimin e Presidentit.

Kryetarja e Kuvendit, Lindita Nikolla lexoi formulën e betimit dhe Presidenti Begaj u betua para Kuvendit me dorë në Kushtetutën e Shqipërisë. Pas himnit kombëtar, Begaj mbajti fjalën përshëndetëse në Kuvend ku falenderoi deputetët për besimin. “Është nder për mua t’i drejtohem Kuvendit si President i Republikës. Ju faleminderit për besimin. Jam plotësisht i vetëdijshëm, se mbi privilegjin e të qenurit qytetar i parë i Republikës rëndon përgjegjësia e përfaqësimit të unitetit tonë kombëtar. Uniteti të pritshmërive dhe aspiratave të bashkëqytetarëve tanë”, tha Begaj.

Begaj tha se, “kjo përgjegjësi vjen në një moment historic për vendin tonë. Shqipëria jonë e dashur ka hyrë në një rrugë të pakthyeshme evropiane. Trashëgimia me mëhershme e dilemave dhe dyshimeve për orientimin e saj I takon tashmë së shkuarës. Shqipëria evropiane, sot premtim dhe nesër realitet është është  kurora e ëndrrës historike të popullit shqiptar. Është përmbushja e projekteve shekullore të njerëzve më të ditur të vendit. Është testament I ardhur prej historisë dhe bekimi i së ardhmes. Shqipëria evropiane është Shqipëria e Gjergj Kastriotit e Nënë Terezës, e Ismail Qemalit dhe Fan Nolit. Është Shqipëria e rinisë anti-fashite dhe studentëve të dhjetorit. Është Shqipëria e qytetarëve që kanë dhunti dhe zotësi për të konkurruar dhe fituar në një shoqëri të bazuar në meritë”.

“Jemi ulur në tryezën e dialogut për të provuar kapitull pas kapitulli, denjësinë tonë si vend e shtet, me pjekuri politike për t’u vetëqeverisur me norma ligjore europiane. Unë e njoh, e mbështes dhe e respektoj punën e qeverisë. Por përpjekja dhe dëshira nuk mund të justifikojnë asnjë dështim. Unë e njoh, e mbështes dhe e respektoj opozitën shqiptare dhe vlerat që ajo përfaqëson, por do të dëshiroja që asnjëherë të mos shihet konflikti përpara bashkëpunimit e të mos lutet dështimi përpara gjetjes së zgjidhjeve”, theksoi Begaj.

Presidenti Begaj shtoi se, “periudha që po jetojmë është një nga më të vështirat dhe me të paparashikueshme që prej Luftës së Dytë Botërore. Pas pandemisë, agresioni Rus, një sulm i paprovokuar dhe i pajustifikuar i Rusisë ndaj popullit të Ukrainës ka futur botën në një tjetër krizë, duke zgjuar kujtimet e errëta të pasojave katastrofike që prodhon lufta. Askush nuk mund të jetë i përjashtuar nga pasojat e saj, as Shqipëria dhe Shqiptarët, të cilët janë rreshtuar në anën e duhur, përkrah aleatëve”.

“Angazhimi ynë, i të gjithëve ne, është të gjejmë mënyra, për të lehtësuar situatën. Të kemi ndenjën e përgjegjësisë dhe duke i paraprirë çdo konsiderate tjetër, të respektojmë vendimet e organeve kompetente, të mos i shmangemi detyrave, e mbi të gjitha të mos përfitojmë nga situatat e vështira.  Vetëm kështu interpretojmë qartë pritshmëritë dhe shpresat e qytetarëve tanë. Shpresa të cilat me dhimbje duhet ta pranojmë se marrin goditje prej 32 vitesh, disa reale, disa edhe të stisura”, nënvizoi Begaj.

“Kriza e tranzicionit të stërgjatë e të lodhshëm, krizat e prodhuara nga brenda apo të importuara nga jashtë, krizat nga mosmarrëveshjet tona, nga paaftësitë për të gjetur një gjuhë e një rrugë të përbashkët, kriza nga papërgjegjshmëria, nga korrupsioni – të gjitha këto kanë prodhuar pasiguri, padrejtësi dhe përjashtim”, u shpreh Kreu i Shtetit.

“U betova sot se do t’i shërbej Kushtetutës, interesit Kombëtar dhe përparimit të Popullit Shqiptar, dhe te përmbush detyrën time sipas parimeve dhe normave të Kushtetutës.  Këtë mision do ta kryej mbi palët, por unë nuk do të qëndroj neutral ndaj asnjërit, që bie ndesh me këtë betim, ndaj asnjërit që vendos interesat politike përpara interesit të Kombit tonë. Do të mbështes, këmbëngul dhe insistoj përherë në bashkëpunimin mes të gjitha forcave politike, në gjetjen e gjuhës së përbashkët, në gjetjen e rrugëve, qoftë edhe shtigjeve të përbashkëta, sepse në fund ne jemi shërbyes të qytetarëve dhe konflikti nuk është asnjëherë një shërbyes i mire”, deklaroi Begaj në fjalën e tij.

“Ne kemi nevojë të ri-dimensionojmë besimin publik, i cili përbën shtyllën e funksionimit të shtetit dhe shpirtin e harmonisë së një kombi.  Ne nuk duhet të shmangemi nga gabimet e së shkuarës dhe të tashmes.  Të largohemi nga politika e konfrontimit dhe ta zëvendësojmë atë me politikën e dialogut dhe të bashkëjetesës, të ndërtojmë bashkërisht ura lidhëse midis klasave politike, shtetasve dhe shtetit”, tha Kreu i Shtetit.

“Me vendosmëri të konsolidojmë shtetin e së drejtës, demokratik e social, për të garantuar të drejtat dhe liritë themelore të njeriut, për një të ardhme siç e meritojnë qytetarët, e dëshiron rinia dhe e ëndërrojnë fëmijët. Të luftojmë për të rigjetur vlerat e humbura dhe forcimin e atyre që tashmë me shumë mund i kemi ndërtuar. Ashtu siç kemi treguar dhe konsoliduar në vite harmoninë fetare, le të punojmë për një harmoni politike dhe njerëzore njëkohësisht”, u shpreh Begaj.

“Në një det të tillë të trazuar nevojitet unitet, më shumë se çdo herë, për të siguruar vitalitetin e kombit tonë, vitalitetin e Shqipërisë. Të gjithë së bashku ta bëjmë Shqipërinë tonë edhe më të bukur, për të qenë në vendin që i takon. Zoti bekoftë Shqipërinë dhe Shqiptarët!”, tha Begaj në fjalimin e tij të parë si President i Republikës, pas betimit në Kuvend.//atsh///