Himarë. Në kujtim të Neço Mukos

Nga Vangjel TAVO

Në Himarën e tij, në sallën që mban emrin e tij, u organizua një takim emocionues kushtuar një personaliteti të kulturës shqiptare, Neço Muko dhe grupit të tij. Rikthyem muzikën e regjistruar në pllaka me muzikë shqip, në vitet 1929-1930 në Paris.

Çfarë e bëri shumë të veçantë takimin dhe këtë moment nderimi, ishte prania e pasardhësve të dy prej këngëtarëve që kënduan shqip në Studiot e “Pathé”:

Eno Koço, i biri i Tefta Tashko Koços. Spiro Çakali, i biri i Koço Çakalit të grupit të Neços.

Maestro Koço theksoi: “Ju duhet të jeni krenarë që një himarjot, sfidoi kohën dhe pati ndriçimin për të udhëtuar drejt Parisit, për të përjetësuar muzikën e vendit nga vinte, të Himarës dhe gjithë Bregut.”

Muzika e regjistruar, që është transmetuar brez pas brezi në Himarë dhe në fshatrat e Bregut, u interpretua nga Katina Beleri, mbesa e Koço Çakalit, e cila bashkë me Grupin Polifonik Karakteristik Himarë sollën disa prej këngëve më të njohura të Neço Mukos.

NE zotohemi se do të punojmë çdo ditë që vlerat dhe personazhet e kulturës sonë të nderohen, të jenë pjesë e aktivitetit tonë kulturor dhe burim frymëzimi për të rinjtë. Tejçimi i traditës është me rëndësi, ndaj do të mbështesim fort të rinjtë që do të lëvrojnë muzikën tonë tradicionale.///