Nis vaksinimi antiCOVID për bluzat e bardha të jugut/ Qendër vaksinimi edhe në Gjirokastër

– Pas Tiranës e Shkodrës, ka nisur sot vaksinimi antiCOVID i mjekëve dhe i infermierëve në qytetin e Vlorës.

Kryeministri Edi Rama i shoqëruar nga ministrja e Shëndetësisë dhe Mbrojtjes Sociale, Ogerta Manastirliu ka ndjekur nga afër procesin e vaksinimit të bluzave të bardha në jug të vendit, në qendrën ngritur në Pallatin e Sportit në Vlorë.

Ministrja Manastirliu informoi se është planifikuar që këto ditë të vaksinohen deri në rreth 200 mjekë dhe infermierë duke filluar nga Spitali i Vlorës, më pas edhe spitalet Bashkiake si spitali i Sarandës.

Për shkak të largësisë, Manastirliu bëri të ditur se edhe në Gjirokastër po planifikohet ngritja e një qendre.

Ajo tha se vetëm në këto dy ditë janë vaksinuar më shumë se 600 mjekë dhe infermierë.

Shefja e departamentit të Epidemiologjisë dhe Kontrollit të Sëmundjeve Infektive pranë Institutit të Shëndetit Publik, Silva Bino tha se pas Vlorës, procesi i vaksinimit të do vazhdojë në Fier.

Bino bëri me dije se paralelisht vaksinimi do vijojë me shtëpitë e të moshuarve në Gjirokastër, Elbasani dhe Korça.

Ajo sqaroi se edhe pranueshmëria është shumë mirë ndërsa asnjë dozë nuk ka humbur.

Procesi i vaksinimit ka vijuar gjatë dy ditëve të fundit në dy qendrat e vaksinimit në Tiranë dhe Shkodër si dhe në Shtëpitë e të Moshuarve. Gjatë ditës së djeshme janë kryer 612 vaksinime anti-COVID për personelin shëndetësor dhe në shtëpitë e të moshuarve.///