PD, Zhupa: 226 mijë nxënës më pak në bankat e shkollës në 15 vjet

Partia Demokratike teksa uroi sot nxënësit dhe mësuesit në ditën e parë të shkollës, ngriti shqetësimin për uljen e numrit të nxënësve në bankat e shkollës. Deputetja Ina Zhupa, përmes një statusi në rrjetet sociale theksoi se numri i nxënësve në bankat e shkollës në këto 15 vite ka rënë me 226 mijë nxënës.

“Fatkeqësisht janë 226 mijë nxënës më pak në bankat e shkollës në 15 vjet. Shifër alarmante që tregon qartë shpopullimin e Shqipërisë nga keqqeverisja”, thekson ajo.

Zhupa po ashtu u ndal te investimet në arsim. “Por edhe pse nxënës më pak, mungesa e vullnetit politik për ti çuar paratë dhe investimet te arsimi ka bërë që problemet të jenë edhe më të thella se 15 vite më parë. Nga premtimet me klasa digjitale, edhe me 4 milionë euro të harxhuara, kemi kaluar te librat e përdorur dhe kërcënimet për fëmijët. Librat e përdorur janë larg të qënurit tekste nga të cilat fëmija mund të mësoj edhe të zhvillohet. Tallja me tekste falas vazhdon në ERTV. Klasat kolektive vazhdojnë edhe pse duhet të ishte realitet i tejkaluar në 2022. Në mes të Tiranës ende zhvillohet mësim me turne. Ndërsa vërehet mungesa e internetit në më shumë se 50% të shkollave rurale( sipas Bankës Botërore vetëm 47% e shkollave rurale kanë akses në internet)”, u shpreh Zhupa.

Deputetja demokrate tha se nuk pa pasur rritje të pagave reale për mësuesit.

“Rrogat e mësuesve janë tregues i qartë se si ka dështuar edhe me arsimin kjo qeverisje. Nga viti 2013 deri tani, duke llogaritur edhe inflacionin, rritjen e çmimeve çdo vit, pothuajse nuk ka rritje reale të pagave me Edi Ramën”, shtoi ajo.