“The Sun”: Shqipëria pushtohet nga turistët: Rezervimet rriten me 293%

 Nëse po mendoni se ku të shkoni për pushimet tuaja të ardhshme, atëherë mund të merrni në konsideratë Shqipërinë, shkruan faqja e njohur britanike The Sun.

Dhe kjo nuk është aspak e habitshme, pasi Shqipëria ka shumë për të eksploruar, duke përfshirë plazhe të bukura me ujëra kristal të pastër, një kryeqytet të qetë dhe verë me çmime të lira.

Së fundmi, edhe pjesëtarët e kastit të TOWIE ishin në Shqipëri, ku po xhironin sezonin e fundit të reality show-t të njohur në Dhërmi, një fshat i vogël pranë Parkut Kombëtar të Llogarasë, në bregdetin e Jonit.

Pesë destinacione mahnitëse dhe pak të njohura për pushime

Një studim i ri ka zbuluar se Shqipëria është ndër destinacionet turistike me rritjen më të shpejtë në Evropë.

Në fakt, sipas Thomas Cook, rezervimet për Shqipërinë janë rritur me një shifër mbresëlënëse prej 293 për qind krahasuar me një vit më parë.

Britanikët që duan të vizitojnë këtë vend ende relativisht të pazbuluar mund të udhëtojnë me fluturime direkte gjatë verës nga Londra, Birmingham, Mançesteri, Edinburgu dhe Liverpuli.

Vizitoni Tiranën

Kryeqyteti i Shqipërisë është Tirana, por pavarësisht se është kryeqytet, këtu nuk do të përballeni me turma të mëdha turistësh.

Në verë, temperaturat në qytet mund të arrijnë deri në 35°C.

Tirana është gjithashtu një nga qytetet me më shumë diell në Evropë, me më shumë se 2.500 orë diell në vit.

Një birrë në qytet mund të kushtojë vetëm rreth 1,50 paund.

Gazetarja e udhëtimeve Cyann Fielding, e cila e vizitoi qytetin së fundmi, tha: “Një nga gjërat që më pëlqen shumë te qyteti është se ende të jep ndjesinë e një vendi të pazbuluar nga britanikët. Nuk ka turma dhe as dyqane tipike suveniresh në çdo cep, siç ndodh zakonisht në destinacionet turistike.”

Në zemër të qytetit ndodhet Sheshi Skënderbej, ku mund të shijoni një pamje të qartë të arkitekturës përreth.

Nëse dëshironi ta fitoni të drejtën për të shijuar një birrë, ngjituni në Piramidën e Tiranës, nga ku mund të shijoni pamje spektakolare të maleve që rrethojnë kryeqytetin.

Gjithashtu, mbani sytë hapur për bunkerët e vegjël, të njohur si ‘pillbox’, të shpërndarë nëpër qytet.

Shumë prej tyre janë shndërruar në bare dhe kafene plot ngjyra e me një atmosferë të veçantë.

Shkoni në “Maldivet e Evropës”

Shqipëria është gjithashtu shtëpia e të ashtuquajturave “Maldivet e Evropës”, në Ksamil, i cili e ka marrë këtë nofkë për shkak të plazheve të bukura, rërës së butë dhe ujërave kristal të pastër.

Mund të vizitoni Plazhin e Ksamilit, ku ndodhet edhe e ashtuquajtura “Dora e Ksamilit”, një shkallë që të çon drejt një platforme në formën e pëllëmbës së dorës, e cila qëndron mbi ujë.

Nëse një plazh nuk ju mjafton, mund të shkoni edhe në Plazhin e Lorit dhe Plazhin e Pasqyrave  të cilët ndodhen në këmbë jo shumë larg nga Plazhi i Ksamilit.

Në Plazhin e Lorit mund të merrni me qira shezlongë dhe çadra.

Edhe vetë qyteti i Ksamilit ofron shumë bare dhe vende ku mund të hani diçka.

Eksploroni qytetet historike

Nëse preferoni të eksploroni historinë, Shqipëria ka disa qytete historike shumë të bukura, si Berati dhe Gjirokastra, të dyja të përfshira në listën e UNESCO-s.

Berati daton rreth 2.400 vjet më parë dhe njihet si “Qyteti i një mijë dritareve”, falë shtëpive të bardha me forma karakteristike dhe kishave të shumta bizantine që datojnë nga shekulli XIII.

Gjirokastra, nga ana tjetër, ndodhet në luginën e lumit Drino dhe është e njohur për shtëpitë e saj të zbukuruara, që datojnë kryesisht nga shekulli XVII.

E njohur si “Qyteti i Gurtë”, Gjirokastra u ofron vizitorëve mundësinë të eksplorojnë një kështjellë që daton nga shekulli XIII, si dhe pazarin e vjetër.

Vizitoni Durrësin

Më pak se një orë larg Tiranës ndodhet Durrësi.
Në qytet mund të vizitoni Amfiteatrin e Durrësit, një nga amfiteatrot romake më të mëdha në Ballkan.

Mos harroni të vizitoni edhe Plazhin e Durrësit, i cili ka një vijë të gjatë me rërë të artë dhe ujëra të cekëta, ideale për familjet.

Golemi

Golemi është një destinacion i shkëlqyer për adhuruesit e plazhit, pasi shtrihet përgjatë një zone të gjatë bregdetare në Adriatik.

Ky vend i bukur ndodhet gjithashtu më pak se një orë me makinë nga aeroporti.

Golemi është edhe një vend i përshtatshëm për të provuar aktivitete të ndryshme ujore, si për shembull shëtitjet me banana boat.  (Oliver SERANI)///