Tuneli i Skërficës, Balluku: Në 2 korrik e dorëzojmë 3 muaj para afatit

-Ministrja e Infrastrukturës dhe Energjisë, Belinda Balluku ideklaroi nje dite me pare nga foltorja e Kuvendit, se rruga Kardhiq-Delvinë, së cilës iu referuan deputetët e opozitës, është një nga veprat më të rëndësishme jo vetëm sa i përket infrastrukturës, por edhe turizmit, pasi lidh dy zona të rëndësishme, Gjirokastrën me bregdetin e jugut dhe Sarandën.

“Loti i parë i Kardhiq-Delvinë ka nisur në dhjetor 2007. Nga dhjetori 2007 deri në shtator 2013 nuk e di se çfarë keni bërë ju që nuk e dorëzuat, por u desh të pritej të dorëzohej nga PS. Gjithashtu edhe loti i dytë ka nisur në dhjetor 2007, por e kemi përfunduar ne, sepse juve nuk ju dolën 6 vite për ta mbaruar. Kështu vazhdon me radhë edhe loti i tretë që e filluat 1 vit më vonë, në 2008, por e përfunduam ne. Ndërkohë që lotet që ne kemi hapur janë dorëzuar brenda afatit. Hapëm në 2008 lotet 4, 5 dhe 6 dhe i dorëzuam në vitin 2021. Këto janë vite që flasin. Ne morëm punët tuaja të lëna rrugëve dhe i përfunduam në kohë rekord, madje hapëm edhe punët tona dhe i mbaruam ashtu si duhej për 3 vite”, tha ajo.

Balluku theksoi se “tani do të dorëzohet edhe tuneli i Skërficës, 3 muaj para afatit.

“Afati i dorëzimit të tunelit të Skërficës është fundi i shtatorit 2022 dhe dorëzohet në 2 korrik 2022. Ne jo vetëm dimë t’i dorëzojmë, por edhe i bëjmë para afatit, sepse e dimë shumë mirë se infrastruktura është nxitësi kryesor i ekonomisë, sidomos i turizmit”, shtoi ministrja.

Ndërkohë ajo tha se rritja prej 20 % e shifrave në këto projekte është e lejuar nga ligji për punime të paparashikuara.

“Ajo rritje shkon për ato të loteve tuaja që i keni bërë pa studim gjeologjik, pa projektim dhe na i është dashur t’i bëjmë skarpatet edhe një herë nga fillimi, pasi kishin ardhur të gjitha në tokë dhe kanë zënë trasenë, si çdo punë që keni bërë. Ashtu si Tiranë-Elbasan, apo si bajpasi i Fierit për vite të tëra, i hapur me kompani që falimentonin njëra pas tjetrës, pa studim, me bllokime të lumenjve e shtrateve të përrenjve, që i kemi parë vetëm nga ju”, tha Balluku.

Në vijim, ajo theksoi se “vetëm për 6 muaj në tunelin e Llogorasë janë hapur 2.5 km nga 5.9 km në total”. Ndërkohë, Balluku theksoi se kjo qeveri ka treguar se di t’i menaxhojë krizat.///