GJKKO vendos “arrest me burg” për Jamarbër Malltezin

 Gjykata e Posaçme e Shkallës së Parë për Korrupsionin dhe Krimin e Organizuar vendosi sot masën e sigurisë “Arrest me burg” për Jamarbër Malltezin. Ndërsa vendosi masën “detyrim paraqitje” për Fatmir Bektashin.

Malltezi u arrestua dy ditë më parë me akuzën e korrupsionit dhe pastrim parash, për dosjen hetimore të privatizimin e ish-kompleksit sportiv të klubit “Partizani”.

SPAK zbardhi një ditë më parë vendimin e masave ndaj Malltezit e Berishës.

Në vijim të hetimit, SPAK shprehet se është krijuar dyshimi i arsyeshëm, i mbështetur në prova se, nga shtetasi Sali Berisha është konsumuar vepra penale e “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim me shtetasin Jarmarbër Malltezi.

Sipas SPAK, shtetasi Malltezi dyshohet se në bashkëpunim me shtetasin Fatmir Bekteshi ka konsumuar veprën penale të “Pastrimit të produkteve të veprës penale ose veprimtarisë kriminale”, parashikuar nga Kodi Penal, duke u paraqitur si investitor në punimet për ndërtimin e bllokut të banesave, ndërkohë që nuk rezulton të ketë investuar, duke kryer veprime financiare, transaksione të copëzuara, apo në cash, për të fshehur origjinën dhe marrë përfitimin monetar në shumën 672 976 832 lekë ose 5 420 345 euro, (përfitim i paligjshëm) duke e paraqitur si e ardhur e ligjshme e siguruar nga investimi në veprimtarinë ekonomike.///