Himarë. Bergner inspekton projektin e KfW-së: Rrit ndjeshëm cilësinë e ujit në plazhe

Në Himarë po zbatohet projekti i financuar nga KfW për ndërtimin e rrjetit të ujërave të zeza dhe një impianti trajtimi, ndërsa pjesa kryesore e punimeve pritet të përfundojë para fillimit të sezonit turistik.

Ambasadori i Republikës Federale të Gjermanisë, Karl Bergner inspektoi sot nga afër këtë kantier, ndërsa vlerësoi se projekti është një hap i rëndësishëm drejt përmirësimit të cilësisë së jetës dhe kushteve mjedisore në Himarë.“Sistemi i ri i ujërave të zeza do të rrisë ndjeshëm cilësinë e ujit në plazhet e Himarës. Në të ardhmen, në det do derdhet vetëm ujë i përpunuar dhe i pastër, një kontribut i rëndësishëm për mbrojtjen e natyrës”, thuhet në njoftimin për shtyp të ambasadës gjermane në Tiranë.

“Nga uji i pastër nuk do të përfitojë vetëm ekonomia dhe turizmi lokal në Himarë, por edhe shëndeti dhe mirëqenia e banorëve. Një shembull i mirë ky i bashkëpunimit të suksesshëm dhe afatgjatë gjermano-shqiptar për zhvillim të qëndrueshëm”, vijon njoftimi.(Nga Maela Marini)///

/m.m/